مساعدة للوصول لصديقين قديمين ziad1515 , S0S098
السلام عليكم.
شوفوا يا شباب ، أولا انا عمري تقريبا ما لعبت أمل الشعوب، بس لعبي كله زمان كان في لعبة عالم الاسرار (والكلام ده من حوالي 5-8 سنين تقريبا، مش فاكر .. أنا حاليا 20 سنة وفي 2 طب بشري أصلا).
القصة ان انا في اللعبة دي كنت اتعرفت على صحاب كتير جدا، بس أيامها للأسف مكانش التعارف موثق، بمعنى انك لما كنت تصاحب حد مكانش بيبقى مابينكم وسيلة ارتباط اوي غير الايميل (ال hotmail وال yahoo) لأن معظم الناس مكانتش بدأت تستخدم الفيس بوك وكده. فاللي حصل اني اتعرفت على صحابي الاتنين دول .. ziad1515 كان مصري عايش في عمان وكان أكبر مني بسنة، و S0S098 (تقريبا كان اسمها الحقيقي اسراء) كانت تقريبا من الأردن. زياد ده كان "شريك الاسرار" بتاعي في اللعبة وكنا أكتر من اخوات فعلا في اللعبة .. بس اللي حصل انه كمبيوتري أياميها كان اتحرق ومجبتش غيره غير في الاجازة الصيفية. وطبعا بانعدام وسائل التواصل .. مكانش فيه اي تواصل ما بيني وما بين زياد أياميها، ومكنتش عارف أقوله اللي حصل.
المهم لما رجعت فتحت اللعبة لقيته كان باعتلي رسايل كتير اوي بيسأل عليا .. بس لما بصيت علي تاريخ اخر ظهور له في اللعبة كان من زمان .. بدأت ابعتله رسايل انا كمان كتير .. بس للأسف مفتحش من ساعتها.
عدت الأيام وبالصدفة سجلت على منتدى عالم الشعوب أيام ما كانت اللعبة ليها اعلانات في كل حتة، بس سجلت فيه وسبته لأني ملعبتش اللعبة.
فتحت بعدها بسنة تقريبا أو حاجة .. لقيت زياد وإسراء باعتينلي رسايل كتير بيقولولي فيها انهم شافوا اسمي في المنتدى وانهم كانوا بيدوروا عليا من أيام عالم الاسرار وكده .. وزياد بعتلي ساعتها ايميل الهوت ميل بتاعه علشان اكلمه عليه لما افتح.
رديت عليهم برسايل كتير بس للأسف محدش فيهم فتح المنتدى من يومها. (اسراء فتحت في 2016 بس مكانتش شافت الرسالة).
والهوت ميل بتاع زياد مكانش بيفتح عليه تماما .. شكله كان نسي الباسوورد او غيره.
المهم .. الاتنين دول عزاز عليا جدا ومن فترة للتانية بفتكرهم وبدعي انهم يكونوا بخير وسعادة ، لأنهم كانوا أصدقاء الطفولة البريئة بمعنى الكلمة.
أنا بجد نفسي أوصل لأي حد فيهم علشان اتطمن عليه.
فبعد اذنكم يا شباب .. اللي عارف أي حد من الاتنين دول يبعتلي بس رسالة وانا هبعتله اكونت الفيس بوك بتاعي علشان يتواصل معايا. بجد يا شباب هكون ممتن جدا ليكم لو حد عنده أي معلومة عنهم.
لينكات الملفات الشخصية بتاعت زياد واسراء:
1. زياد
http://rappelz.gamepower7.com/Forum/...72191-ziad1515
2. اسراء
https://rappelz.gamepower7.com/Forum...?500507-S0S098
انا حتى لو محدش رد عليا دلوقتي .. انا كده كده بدخل الاكونت ده كل فترة علشان اشوف اذا كانوا فتحوا ولا لا .. فيا ريت لو أي حد فيهم شاف المشاركة بتاعتي دي سواء السنادي أو السنة الجاية أو غيرها (إن ربنا أحياني) يعرف اني كنت بدور عليه.. و يا ريت يبعتلي أي رسالة.
شكرا ليكم جميعا وربنا يوفقكم يا شباب.
