السلام عليكم

الكلمات التي انتم على وشك قراءتها كتبتها باللهجة التونسية لكن حاولت التبسيط ليصل المعنى اليكم ^^

هوني بلادنا المزيانة
بلاد الزين و الرزانة
بلادنا اللي من قعر الظلمة تطلع محملة مليانة
و الأحمر على ترابها ذخامة و فيانة
أحمر دم شهيد فاوح بالبخور و العجعاج
و حب شعب ما يخافش و يقول ديڨاج
بلادنا بيبانها محلولة
باب بحر ، باب بنات ، باب سعدون ،باب الفلة ، باب سويقة و باب جديد
أبواب المدينة و الأسواق العربي
خرجة سيدي علي الحطاب و عيساوية البلوط
تاريخ عريق منقوش على حجر الزناقي و تراكن البلاد
و حب كبير مكتوب على حيوط بش تنطق و قلب كاسح يعزق
يعزق لبن خلدون و فرحات حشاد
للشابي و الطاهر الحداد
حتى لخميس ترنان ، عزيزة عثمانة، الكاهنة ، بورڨيبة و السيدة المنوبية
و تونس الونس
تونس الضحكة و الدمعة
في قلب العتمة تضوي كالشمعة
تونس تموت و تقول للعالم يعيشك تونس بهلال و نجمة عالعلم
بلاد الجود الحنانة و الكرم
تونس عرجون التمر و ريحة البحر
ياسمين فاوح و زيت نضوح
جامع عقبة ، الفسقية و جمل بروطة
الجم و ديار الجنوب
حنة ڨابس ، الفن و صوت قرطاج
تونس قبل و بعد الإستعمار
تونس الأربعطاش و الحضارة اللي ما توفاش
تونس السينما و المسرح
تونس القلم و الفيشة
تونس الوهرة ، الوقار و الريشة
الشطحة ، الدربوكة و الربوخ
الكتب ، المؤرخين و المدونين
الشعر و اللحن و الصلام
و النور الهارب مالظلام
تونس زرقة سماء صافية و جناين سجنان
تونس الشبيبة و المحفل المليان
تونس تتكلم ، تتكلم خاطر العالم بلا بيها يسكت
و سنوات ضوئية على ظهرها تسقط
تونس المخدة الحنينة و فيها نلقى العيشة البنينة
تونس الحرية و كذبة الحياة الأبدية
تونس الضو بعد الضلمة
ضحكة ممحون و فرحة اول كلمة
تونس صباح طالع على ظهر شمس فنارها يوجع العين
تونس وشمة مرشوقة عاليدين
تنزل،تقرص و تحفر بلاصة عاللحمة
تونس بلاد الشعب ، الصرخة و اللحمة
تونس ليل ما يوفاش
و الصباح عليه يتعالى و مايعلاش
و نحبك
نحبك و حروفي من خضارك تتدحرج
انت تزهر و أنا نترهوج
و بخيرك نتسكر و أول حرف ننسى ماعاد نتفكر